Przepis napisany jest w języku śląskim. Numery przy słowach odsyłają do umieszczonego poniżej słowniczka.
Jak żech bōł bajtlym1, to mi Muter niyrozki to robiōła, bo przeca cojś trza bōło ze tymi starymi bōłkami zrobić, ale że to sie nazywo armeriter, to żech sie dowiedzioł dopiyro niydowno, bo piyrwy my przypiykali bōłki tōnkane2 we jajku i mlyku i żodnych nazwōw to niy potrzebowało. Terozki to żech sie nawet posprawdzoł historia tego dania i pōnojś idzie podobny recept3 znojś we jednyj z nojstarszych ksiōnżek kucharskich „De re coquinaria” („Ło warzyniu”)- kaj je pedziane4, że u Chopa niy moge być łaciny, a przi okazji mołcie piyrszy przekład tego tytułu na ślōnsko gołdka. We tyj ksiōnżce sōm recepty łod starożytnych Rzymianōw. Łoni tam ponojś mieli jakiś taki chlyb, co to go tōnkali we mlyku, piykli na łoleju, a potyn na wiyrch lołli5 miōd. I tak sie to łod nich rozeszło na całoł Europa, bo kołżdy kraj moł jakojś tego wersja. Ta nasza nazwa sie wziyna łod niymieckego Arme Ritter, co oznaczo biydnych rycerzy, a że sam nic specjalnego niy je nōm potrzebne, to dzisiaj i biydne sztudynty6 mogōm sie to lajstnōńć7.
Armeriter (Danie recyklingujące czerstwe bułki) - przeps krok po kroku
Składniki - co potrza?
- 3 stare bōłki abo jak to niyftorzi gołdajōm8: żymły (jak byjście mieli lynga9 abo wek- bo to tyż moł roztomajte10 miana11, to tyż baje dobre),
- 2 jajca,
- szklōnka mlyka,
- 2 łeżki cukru,
- 2 łeżki masła klarowanego,
- kapka łoleju12,
- pudecuker,
- Mogecie tyż dać:
- Cimt13– kebyjście chcieli, żeby bōły barzi14 cimtowe,
- miōd - jak ze 1700 lołt tymu mogli na wiyrch lołć miōd, to czamu my niy mogymy.
Sposób przygotowania
Jajca rozfyrlejcie15 (mogecie i mikserym) ze cukrym i mlykiym. Rozgrzyjcie sie na patelni łeżka masła i kapka łoleju. Pokrejcie bōłka na szajby16, porzōndnie tōnknijcie we jajcach z mlykym i wciepcie17 na patelnia. Jak sie fajnie przibrōnołci18 ze obu strōn, to wciepcie je na talyrz, posypcie pudecukrym (abo i cimtym- choć joł tam wola yno ze cukrym) i sie biercie za maszkycynie19. Smacznego.
Słowniczek:
- dzieckiem
- moczone
- przepis
- gdzie jest powiedziane
- lali
- studenci
- pozwolić sobie na coś
- mówią
- bułka paryska
- różne
- nazwa
- trochę oleju
- cynamon
- bardziej
- roztrzepać
- kromki
- proszę wrzucić
- przypiecze
- rozkoszowanie się, jedzenie
Klaudiusz Kaufmann zgromadził na swoim FP grono wiernych odbiorców i jak sam przyznaje, spośród owych 55 tysięcy fanów, większość stanowią kobiety. Szczegóły możesz sprawdzić tutaj.
Zobacz także:
- Proste bułki i słodkie bułeczki. Poznaj domowe przepisy
- Domowe bułeczki - przepis na pyszne, świeże pieczywo
- Buła i spóła, czyli bułka niejedno ma imię. Sprawdź przepisy Andrzeja Polana
Autor: Teofila Siewko
Źródło: Klaudiusz Kaufmann
Źródło zdjęcia głównego: Mateusz Grochocki/East News